جنابِ احسن کے والدین نے جب اِن کا نام اَحْسَنْ رکھا ہوگا تو شاید اُن کے وہم و گمان میں بھی نہ ہوگا کہ یہ نَو نہال بڑا ہو کر اپنے احسن کلام سے کشتِ سُخن کی آبیاری بھی بطریقِ احسن کرے گا ۔ مَوصُوف خانوادۂ رسُول علیه الصلوٰةُ و السلام حضرت زین العابدین کی ذُرِّیَت میں ہونے کے ناتے عابدی ہیں ۔ عابدی نام ہی کے نہیں ، دیکھا تو اب تک نہیں ، لکھنؤ میں ہی میں بھی بڑھا پَلا ، وہیں پڑھا لکھا ہے ، ماہ و سال کا اتنا تَفَاوُت ہے کہ شرفِ مُلاقات کبھی حاصل نہ ہوا ، مگر جو کچھ اِن کا لکھا پڑھتا ہوں اُس سے اندازہ یہی ہوتا ہے کہ عابد بھی ہیں ۔ شائستگی ، سادگی ، اور حُسنِ خیال کا مُرَقَّع ہوتا ہے کلامِ احسن ۔ آپ کے اجداد ایران سے ہجرت کر کے بلگرام میں اپنی ریاست قائم کی اور پھر دادا مرحوم کے نوابینِ اودھ کے مُعالج حکیم ہونے کے سبب ان کے خاندان کا لکھنؤ آ بسنا ممکن ہوا ۔ احسن صاحب معروف محلہ اکبری گیٹ چوک لکھنؤ میں دسویں اپریل کو سن ۱۹۵۱ عیسوی میں تولد ہوئے ، جبکہ اُس وقت میں لکھنؤ کرسچین کالج میں انٹر میڈیٹ کا طالب علم تھا اور سن ۱۹۵۷ میں جبکہ ابھی شاید یہ گھر کے آنگن ہی میں کھیلتے ہوں گے پاکستان چلا آیا ، تو مُلاقات کا کیا امکان ۔ احسن سادات کے اُس طبقے سے مُتعلُق ہیں جو زبان و بیان میں لکھنوی تہذیب کی مثالی معروفِ زمانہ ٹکسالی زبان کہلاتی ہے ۔ ہمارے بزرگ بڑی احترام سے لکھنؤ کی سیدانیوں کو اپنے گھروں میں مہمان رکھتے تھے کہ بچے زبان ، لہجہ اور بیان سیکھ سکیں ۔ مجھے اپنے بچپن کی سیدانی جو میرے گھر اکثر ایک معزز مہمان کی حثیت سے دو دُو تین تین مہینے آکر رہا کرتی تھیں ، جنھیں ہم لکھنؤ والی خالہ کہتے تھے ۔ اُنکے طوطے کا پنجرا اُن کے ساتھ رہتا تھا ۔ ایکبار یَکِّہ سے اُترتے ہوئے جانے کیسے پنجرے کی کھڑکی کھل گئی اور طوطا نکل گیا ۔ مجھے آج تک خالہ کا وہ جملہ یاد ہے " لُو لُو میاں میرا طوطا اُڑ گیا ۔" اب اِس جملہ کی بلاغت کو مُلاحظہ فرمایئے ۔ کس مُصیبت سے اُس طوطے کو قابُو میں کیا گیا ۔ جاڑے کی راتیں خالہ سے کہانیاں سُنتے گزرتی تھیں ۔
آحسن شاعر کیسے بنے بڑا منفرد واقعہ ہے ۔ نو برس کی عمر میں گھر پر ابتدائی تعلیم حاصل کرنے کے بعد لکھنؤ کے مشہور شیعہ کالج کی سٹی برانچ میں داخل ہوئے ۔ کلاس میں بیت بازی کی ٹیم کے انتخاب میں ناکامی نے احسن کو شاعر بنا دیا ۔ میں نے اِن کے مُنفرد انداز میں شاعر بننے کی بات کیا غلط کہی ۔ ناکامی کے سایہ میں پروان چڑھنے والا کامیاب شعر و سُخن کے میدان کا کوئی اور شاعر آپ کی نگاہ میں ہو تو نشاندہی کیجئے ، مزید یہ کہ تعلیم تو مُکمل کی بی ۔ کام کی ، حساب کتاب کی ڈگری لے کر ، اور کام کیا دبستانِ لکھنؤ کی گم گشتہ تہذیب و روایات کو جِلانے کا ۔ اَحسن صاحب نے تمام اصنافِ سُخن میں طبع آزمائی کی ہے ۔ بہت اعلٰی حمدیہ ، نعتیہ ، مُنقبتُوں ، سلاموں اور اہلِ بیت اطہار کی شان میں بسیُوں نظمیں مُسدسیں ، تخمیسیں ، مشاہیر کی زمینُوں میں غزلیں ، خوبصورت نظمیں ، قطعات اور رُباعیات کا ایک ذخیرہ ہے احسن کے پاس جو بیاضوں میں محفوظ ہے مگر زیورِ طباعت سے اب تک کیوں محروم ہے ، باعثِ حیرت و افسوس ہے ، وجہ ، جو سمجھ میں آتی ہے ، وہ عابدی صاحب کاا انکسار اور نام و نَمُود سے پرہیز ہی کہا جا سکتا ہے ۔ احسن کی غزلیہ شاعری بھی عام اندازِ غزل گوئی سے مُختلف ہے ۔ گُل و بلبل ، عارض و گیسو سے ہٹ کر ، معاشرتی نا ہمواریاں ، بے راہرویاں کثرت سے ، نہایت پُر اثر انداز میں بیان ہوتی ہیں ۔ ایک بات اور احسن کی غزلیہ شاعری میں قابلِ غور ہے کہ غزل روایتی انداز میں پانچ سات ہی اشعار پر مُشتمل نہیں ہوتی ، تسلسُل سے اشعار ہوتے جاتے ہیں اور " گڑ بڑ جھالے " والی کیفیت بھی محسوس نہیں ہوتی ، مَربُوط اور مُرَصَّع غزل پندرہ سُولہ اشعار تک پہنچ جاتی ہے ۔ احس صاحب کے مرحوم والدِ گرامی صاحبِ دیوان ہیں ۔ قصائد ، نعتوں ، منقبتُوں اور سلام پر مُشتمل کلامِ سید محمد سجاد عابدی " راسِ مَغفرت " مطبوعہ ہے ۔ اس طرح واضح ہوا کہ سید احسن سجاد عابدی کو ذوقِ شعری وراثت میں ملا ۔ اپنی زندگی کا پہلا شعر جو احسن صاحب کی یاد داشت میں محفوظ ہے :
" خُواب ، آنکھوں میں ، مچلتے رہ گئے ،
اے خُدا ! ہم ہاتھ ملتے رہ گئے ۔"
میں نے بہت سے شعراء کو پڑھا ہے ، ماضی کے مشاہیرِ بھی اور دورِ جدید کے شعلہ بیان شاعر بھی بہت سے ، تقابُل تو ادب کے آداب کے تحت نا مُناسب ہے ، مگر بلا مُبالغہ اتنا کہنے میں بھی عار بھی نہیں کہ کلامِ احسن اپنے ہمعصروں میں احسن ہے ۔ میری اِس بات کو علاقائی نسبت کی جانب داری تصور نہ کیا جائے ، جو نمُونۂ کلام احسن صاحب خود اور، احباب پیش کریں گے اُس سے آپ خود ہی اندازہ کر لیجئے گا ۔ اردو کی وکالت میں جو نظم احسن نے بطریق احسن پیش کی ہے اُسی پر اکتفا کروں گا ۔ کلامِ احسن سے میں کچھ اور نہ پیش کروں گا پر اتنا ضرور عرض کروں گا کہ جس طرح سے ایک وکیل اِستِدلال کے ساتھ اپنے مُوَکِّل کا عدالت میں مُقدمہ لڑتا ہے ، دفاع کرتا ہے ، احسن نے اپنی بی ۔ کام کی سند سے وہ کام لیا ۔ کامرس کے اُصول بھی استدلال پر مبنی ہوتے ہیں ۔ اب تک اردو کا مُقدمہ معذرت خواہانہ اور عاجزانہ انداز میں کیا گیا تھا یا کسی نے اردو کا نوحہ لکھا " اردو کا جنازہ ہے ذرا دھوم سے نکلے " مگر اَحسن نے جو کہا ، ذرا توجہ سے ملالحظہ فرمایئے ، رعب و دبدبہ ، تاریخی حقائق کے ساتھ ، اِس سے قبل اتنی مُدَلَّل وکالت کسی نے نہ کی تھی :
فکر اب نالہ و شیون کی نہ دَم ساز کی ہے
نہ مسیحٰی کی ضرورت ہے نہ غَمَّاز کی ہے
پر کترنے پہ نہ خوش ہو میرے صیاد بہت
بازوئے فکر میں ، طاقت ابھی پرواز کی ہے
نسسِ باریکیِ نُدرت کی حلاوت کی قسم
میری غزلوں میں جھلک اک نئے انداز کی ہے
لفظ و معنی کے دمکتے ہوئے موتی مجھ میں
نہ مُغَنِّی کی ضرورت نہ کسی ساز کی ہے
دل سے ہے قوسِ قزح رنگِ تَغَزُّل پہ نثار
ہر طرف دُھوم جو شیرینیِ انداز کی ہے
گلشنِ ہند میری جاءِ ولادت ہے سنو
بات یہ میرے لئے فخر کی ہے ناز کی ہے
پرورش میری بڑے پیار سے کی تھی تم نے
دلکشی مجھ میں اُسی پیار کے انداز کی ہے
مجھ میں باقی ہیں وہ شاہانہ تَمَدُّن کے نشان
یاد اب جسکی بہت فخر کی اعزاز کی ہے
میں ہوں اردو کہ ہوں میں مَعدَنِ آدابِ سخن
کیوں نِیَّت مجھ پہ بُری تفرقہ پَردَاز کی ہے
کچھ سیاست کے پرستار میرے پیچھے ہیں
کیا کہوں کیسے کہوں بات بہت راز کی ہے
مجهکو فرقون مین نہ تقسم و مُقَیَّد کر لو
یہ سیاست تو بس اِک چنگلِ شہباز کی ہے
میں نہ ہندو نہ مسلمان نہ عیسائی ہوں
نہ کسی ملک سے بَسنے کو یہاں آئی ہوں
میں اِسی ملک کی بیٹی ہوں ذرا یاد کرو
خود بھی آباد رہو مجھکو بھی آباد کرو
میں ہوں غالب کی زبان گر تو ہوں ملا کا دھن
میر ہے گرچہ میری روح تو چَکبَست بدن
میرا مذھب ہے مزاجوں کو مُنَوَّر کرنا
دل میں اخلا ق و مَحَبَّت کے سمندر بھرنا
مذھب و قوم کے چنگل میں پھنساؤ نہ مجھے
خار تخریب کے ہَوِّے سے ڈراؤ نہ مجھے
ہر مذہب ، فرقہ و ہر قوم کی منھ بولی ہوں
سب زبانوں کی سہیلی ہوں ، میں ہمجولی ہوں
مجھکو تفریق کی زنجیر نہ پہناؤ حُضُور
چھوڑ کر مذہبی تکرار اِدھر آؤ حُضُور
اپنے اجداد کی تاریخ اٹھا کر دیکھو
اپنے ماضی سے ذرا ہاتھ ملا کر دیکھو
اپنے خوں میں مجھے تحلیل کیا تھا تم نے
اور شہزادیِ تخئیل کہا تھا تم نے
میں پلی پوسی ہوں اس ملک کے گہوارے میں
پانچ سو سال سے چرچے ہیں میرے بارے میں
مجھہ میں محفوظ تھا اس ملک کا قانونی نصاب
سب ہی باشندے تھے اس ملک کے ، میرے احباب
میں نے سکھلائے ہیں آدابِ محبّت سب کو
اور بتاتی رہی اسرارِ اُخُوَت سب کو
راج کرتی تھی دلوں پر کہ ہوں میں شیریں زبان
ذہن و دل ہر کس و ناکس کے ہی ہیں میرے مکان
آؤ پھر مل کے دیئے اُنس و مَحَبَّت کے جلائیں
پھر وہی پرچمِ آزادی ، رِفَاقَت سے اٹھائیں
پھر اُخوت کے دیئے سب کے دُوارے دَھر دیں
آؤ کہ دل میں پھر اَخلاق کے مُوتی بَھر دین
پھر چلے ملک کے آنگن میں وہ ہی پُروائی
پھر رہیں پیار و محبت سے میرے شَیدائی
میں نہ ہِندُو نہ مسلمان نہ عیسائی ہوں
نہ کسی ملک سے بسنے کو یہاں آئی ہوں
میں اردو ہوں ، میں اردو ہوں
کوئی تبصرے نہیں:
ایک تبصرہ شائع کریں